Pagtabang Alang sa mga Biktima sa Sunog sa Bolton Isla

MAGPAKABANA KITA !

Niadtong Oktubre 16, 2026, sa alas 4:00 sa hapon, natingala ang katawhan sa Bolton Isla, Purok 18, Brgy. 76-A Bucana, dihang mikaylap ang dakong sunog sa maong lugar. Mukabat sa 48 ka pamilya, lakip kapin-kulang 25 ka mga estudyante ug trabahante nga naga renta didtong dapita nga naapektuhan sa makalilisang nga insidente.

Dali nga mitubag ang atong mga PDART sa parokya, samtang ang atong PSA mitabang sa pag-ila ug paglista sa mga apektadong pamilya.

Sa among pagbisita sa maong lugar, among nakita ang mga pamilya nga nawad-an og panimalay—lakip ang mga bag-ong natawo nga bata, mga tigulang, mga masakiton, ug mga estudyante.

Dako kaayo ang natampo sa atong kapilya, ilabi na sa higayon nga ang mga apektadong pamilya nanginahanglan og temporaryong kapuy-an. Dali usab nga giila sa atong mga boluntaryo sa simbahan ang mga nag-unang panginahanglan sa atong mga kaigsuonan nga naapektuhan.

Ang San Pedro Cathedral, ubos sa pagpanguna sa among Rector nga si Msgr. Paul A. Cuison, uban sa mga kaparian, PSAM, ug GSAC, diha-diha nga nagpadala og init nga mga pagkaon, food packs, hinatag nga mga sinina, bottled water ug uban pa.

Ang mga pamilyang naapektuhan naglaom nga makabangon pag-usab ug makatukod og bag-ong panimalay.